ភ្នំពេញ៖ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េត្រូវបានគណៈអចិន្ត្រៃយ៍សភាសម្រេចបញ្ចូលក្នុងសម័យប្រជុំពេញអង្គសភាដើម្បីប្រជុំអនុម័តនៅថ្ងៃទី២៩ ខែធ្នូ ឆ្នាំ២០២១ខាងមុខ បន្ទាប់ពីគណៈកម្មាការជំនាញពិនិត្យសិក្សានិងធ្វើរបាយការណ៍រួច។

ប្រធានរដ្ឋសភាសម្ដេច ពញាចក្រី ហេង សំរិន បានដឹកនាំប្រជុំគណៈកម្មាធិការអចិន្ត្រយ៍នៅព្រឹកថ្ងៃច័ន្ទនេះនឹងបានសម្រេចបញ្ជូនកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ជាមួយសេចក្ដីព្រាងច្បាប់ទាក់ទងនឹងពាណិជ្ជកម្មចំនួន២ទៀតដាក់បញ្ចូលក្នុងសម័យប្រជុំពេញអង្គរដ្ឋសភា។

សេចក្ដីព្រាងច្បាប់ទាក់ទងនឹងពាណិជ្ជកម្ម២ទៀតនោះគឺសេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីសហគ្រាសពាណិជ្ជកម្ម សេចក្ដីព្រាងច្បាប់ស្ដីពិវិសោធនកម្មច្បាប់ស្ដីពីវិធានពាណិជ្ជកម្មនិងបញ្ជីពាណិជ្ជកម្ម។

កាលពីថ្ងៃទី២៦ ខែតុលា ឆ្នាំ២០២១ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្កិ បានចុះហត្ថលេខាជាផ្លូវការយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េជាមួយរដ្ឋមន្ត្រីពាណិជ្ជកម្មនៃសាធារណរដ្ឋកូរ៉េលោក YEO Han-Koo។ កម្ពុជារំពឹងថាកិច្ចព្រមព្រៀងសេរីនឹងជំរុញកំណើននៃការនាំចេញ កំណើនផលទុនសរុបក្នុងស្រុក និងកំណើនការងារ ដែលនឹងជួយស្ដារឡើងវិញនូវសេដ្ឋកិច្ចពីផលប៉ះពាល់នៃជំងឺកូវីដ-១៩។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ មាន១០ជំពូក និង១៣១មាត្រា ដែលគ្រប់ដណ្ដប់លើពាណិជ្ជកម្មទំនិញរួមមាន ស្ដង់ដារបច្ចេកទេស នីតិវិធីវាយតម្លៃភាពអនុលោម វិធានការអនាម័យនិងភូតគាមអនាម័យ ឧបាស្រ័យពាណិជ្ជកម្ម វិធានដើមកំណើត នីតិវិធីគយនិងកិច្ចសម្រួលពាណិជ្ជកម្ម កិច្ចសហប្រតិបត្តិការសេដ្ឋកិច្ច តម្លាភាព យន្តការដោះស្រាយវិវាទ ការទាមទារសំណង ការរៀបចំស្ថាប័ន និងអវសានប្បញ្ញាត្តិ។ ត្រូវបានគណៈរដ្ឋមន្ត្រីអនុម័តយល់ព្រមទាំងស្រុងកាលពី១៦ ខែធ្នូ ឆ្នាំ២០២១កន្លងទៅ៕